ناشد الشيخ محمود التهامى، نقيب المنشدين، المواطنين بالرأفه فى تعاملهم مع الحيوانات والكلاب بالتحديد وعدم تسريبهم فى الشوارع بعد انتشار شائعات بإصابتهم بفيروس كورونا المستجد “كوفيد 19”.

وكان نقيب المنشدين ظهر في مقطع فيديو له، وبجواره الكلب الخاص به قائلا: “الفيديو دا بخصوص الناس الى بتقول إن الكلاب بتنقل عدوى الكورونا، ويعز عليا أنى آلاقى ناس كتير من المحترمين مدعين الإنسانية إلي رمت كلابها وحيواناتها فى الشارع، لا حضرتك مفيش ولا واقعة أصيب فيها الكلب بالوباء، الكلاب مش بتتصاب، وزى ما أنتوا شايفين الكلب بتاعنا خايف على نفسه ولابس الكمامة أهو”.

وتابع: “لما بيجى يقعد معانا خايف مننا وبيلبس الكمامة، رجاء لله احتوا حيوانتكم وحيوانات الشارع، ربنا قال بضعفائكم ترحمون، علشان ربنا يرفع عنا الوباء يا ريت يبقى عندنا نوع من الإنسانية والآدمية والاعتبار لمخلوقات الله، وزي ما أنا قلت قبل كدا اللي يقولك الكلب نجس، قوله ربنا مبيخلقش حاجة نجسه الكلاب مبتنقلش العدوي، واللي يقولك الكلاب بتنقل العدوي قوله أغسل إيدك أنت كويس بس، الكلاب مبتنقلش عدوى”.