أنت كياد وأحنا عندنا دم وبنحس وزهقنا.. محمد رمضان فى مرمى النيران بعد فيديو غرفة العمليات
نشر الفنان محمد رمضان أمس فيديو من داخل غرفة عمليات وعلق ساخرا” ابقوا اوقفوا الدكاتره” فى إسقاط وسخرية من أزمته مع الطيار أشرف أبو اليسر الذى تم وقفه عن العمل بسببه.
فيديو رمضان من داخل غرفة العمليات آثار حفيظة الجمهور وعددا من الإعلاميين الذين وجهوا هجوما شرسا على محمد رمضان، وطالبوه بضرورة مراجعة نفسه بدلا من السخرية من المجتمع.
من جانبها، شنت الإعلامية بسمة وهبة هجوما حادا على محمد رمضان، وقالت نصا: “أجواء نمبر وان والأسد وعبده موته سيطرت على الفنان وبدلا ما يراجع نفسه طلع يسخر من الناس والمجتمع كله”.
وأوضحت وهبة: “عيب أوى الفنان ميعرفشى بيعمل إيه.. واضح إن محمد رمضان فاهم المصريين غلط وبينسوا وده ما بيحصلش”.
وقالت “وهبة”، خلال برنامجها “كل يوم” المذاع على شاشة “on e”: “الناس العاقلة والمتحضرة خصوصًا لما يكونوا شخصيات عامة لما تحدث مشكلة لازم يكونوا قدوة لجمهورهم فى المعارك والتعامل مع الأزمات، وهذه هى ضريبة الشخصية العامة صاحبة الجمهور والمتابعين.. لو ليك حق خده باحترام والحوار، لكن موقف محمد رمضان فى أزمة طيار أشرف أبو اليسر، حاجة لا تليق أبدأ بلقب فنان وشخصية عامة”.
وأضافت:”رمضان بدل الهدوء زعق وبدل التحضر اتريق، وحول المشكلة لخناقة وكأنه عايش دور عبده موته وهيقفل الشارع وهينيم الناس من المغرب.. محمد رمضان بيقول على نفسه جدع وابن بلد ووعد الطيار علنًا بأنه سيساعده وسيحل المشكلة، وعمل بطل وشهم أمام الناس وتخيل إن الناس هتنسى، لكن ذلك لن يحدث”.
كما وجهت الإعلامية دعاء فاروق رسالة شديدة اللهجة للفنان محمد رمضان، تجاه تصرفه بشأن الفيديو الذي نشره داخل غرفة عمليات ساخراً من أزمة الطيار الموقوف عن العمل.
وكتبت فاروق، عبر حسابها على موقع الصور إنستجرام: “هل تعلم يا نجم النجوم إن هناك ما يسمى بالمن والأذى في القرآن الكريم، فإذا عرضت المساعدة على أحد ثم فضحته بنشر هذا العرض أو هذه المساعدة على الملأ فهذا يسمى منٌ وأذى”.
وأضافت: “عندنا دم يا أخي، بنحس بالناس يا سيدى، بتفرق معانا مشاعرهم يا فنان يا حساس، لم يصبنا فيروس التباهي بأذية مخاليق ربنا والتريقة عليهم بعدها، حضرتك بتكيد زى النسوان الكيادة، الطيار اللي اتوقف بالفعل مدى الحياة بسبب منظرتك، تاريخ طويل كان يجب أن ينتهي بتكريم وخروج مشرف انتهي بخروج مخزي بسبب فيديوهات جنابك اللي بتبتلينا بيها كل يوم”.
وأوضحت: “مش معقول يا محمد خلاص بقي بقالك كتير مهم ومشهور وبتركب كل يوم طيارات خاصة وعربيات من الفضاء وإحنا مصدقينك والمصحف ونبصم بالعشرة إنك واصل وأغنى من سلطان بروناي، خلاص بقي إحنا زهقنا ومش فارق معانا على فكرة والطيارات الخاصة مش عَجَبة لأن الكل بيركبها دلوقتي ومفيش ممثل أو مطرب ماركبهاش، من كتر ما شفنا صورها بقت عاملة زى التاكسي الأبيض، إنت مزهقتش؟”.
واستكملت حديثها: “إحنا مش منبهرين خالص وإنت لسه منبهر؟ واحد تاني كان اتكسف واستخبى وراح باس على رأس الراجل اللي اتمنع من شغله لآخر عمره.. مش يتمنظر بمنتهي الجهل بإنه جاب له شغلانة وهو ممنوع من ممارستها.. الطيار أخطأ وأخذ جزاءه لآخر العمر بسبب سماجة منقطعة النظير، غلطته إنه سمح بيها ومش هنكتر سكاكيننا على الرجل لأنه مش ناقص بعد العقاب الرادع الذي يعتقد البعض أنه يستحقه ويتعاطف معه البعض الآخر”.
وأنهت حديثها: “أنت بقى بسكينتك التلمة شمتان وبتتريق كمان، يا أخي تغور الشهرة والموهبة وحب الناس لو ماعملتلهاش ألف حساب، أنا مكانش عندى مشاكل معاك خالص وكنت بقول فرحان بنجاحه وماله أما يفرح، إنما تتسبب في أذية الناس وتشمت فيهم كمان.. يبقي إخص عليك يا محمد يا رمضان”.
محمد رمضان، كان قد نشر فيديو عبر حسابه على إنستجرام ظهر فيه داخل غرفة عمليات عقب عملية جراحة، وداعب الكاميرا وعلق: الدكتور اللي صورني وقفوه عن العمل مدى الحياة.
وتابعت: “أى أنه حبط عملك ولا قيمة له لا دنيا ولا آخرة، هل تعلم يا نمبر وان أن المنظرة بفعل الخير وبمساعدة الناس اسمها رياء، والرياء يا نجم هو الشرك الخفى الذى لا يقبله من لا شريك له، هل تدرك يا مبدع أن تعليقك على هذا الفيديو بأن الدكتور اللى صورك اتوقف مدى الحياة اسمه تلقيح بالكلام وكيد وهمز ولمز وسخرية واستهزاء بموقف حزننا له جميعا».
